Tuesday, June 14, 2011

മരണ മൊഴി





എഴുന്നേറ്റിരുന്നു പറയണമെന്നുണ്ട്,
എന്നെ കൊന്നത് നീയാണെന്ന്.
വെട്ടി മുറിക്കല്‍ തുടങ്ങുമ്പോഴാകും
സംസാരിക്കാനാകുക  ,
ആര്‍ക്കറിയാം?

പണ്ട് കുട്ടിക്കാലത്ത്
അമ്മ പറഞ്ഞിരുന്ന
കെട്ടു കഥകളില്‍
മറ്റൊന്നു മാത്രമാകാം,
കണ്ണടഞ്ഞു പോയാലും
പോസ്ടുമോര്‍ട്ടം മേശക്കു മുകളില്‍ കിടന്ന്‌
ശവം  സംസാരിക്കുമത്രേ!

കരളു  പറിച്ചാണ് കൊന്നത്,
ഇനിയെനിക്കീ
ഡോക്ടര്‍ മാത്രമാണ് 
അവസാന പ്രതീക്ഷ!


മഴനൂലില്‍ കൊളുത്തിയിടാമോ
താഴെ വീഴ്ത്തില്ലെന്നു ഉറപ്പ്,
ഞാനത് വിശ്വസിച്ചു,
കടല്‍ പാലത്തിനു മുകളില്‍ നിന്നാല്‍
ഒരു കാഴ്ച കാണിക്കാമെന്നു നീ,
കടലോളം പേക്കിനാവ് കാണുന്ന കടലില്‍
 മഴനൂലിന്റെ കെട്ടു  നീ പൊട്ടിച്ചിട്ടു.

എന്റെയീ തലയോട്ടി പിളര്‍ക്കും മുന്‍പെന്നെ
എഴുന്നേല്‍പ്പിച്ചിരുത്താമോ ?
ഒന്ന് കൂടി പറയാനുണ്ട്,
മഞ്ഞു കാറ്റിന്റെ  ചുഴിയില്‍പെട്ട്
കടലില്‍ വീഴും മുന്‍പ്‌ 
നിന്നോട് പറയാന്‍
നാവടഞ്ഞു പോയ
എന്റെ മരണ മൊഴി,
അതിപ്പോള്‍ രേഖപ്പെടുത്താമോ?


"ഇപ്പോഴും  ഞാന്‍ നിന്നെ പ്രണയിക്കുന്നു".


******************************

http://vettamonline.com/?p=7767
വെട്ടം ഓണ്‍ലൈന്‍ മാഗസിനില്‍ വന്നത്   


4 comments:

പട്ടേപ്പാടം റാംജി said...

സ്നേഹത്തിന് പ്രതികാരമില്ല.
നന്നായിരിക്കുന്നു.

കൊമ്പന്‍ said...

വളരെ നല്ല വരികള്‍

വി കെ ബാബു said...

മരണത്തിന് പ്രണയത്തിന്റെ മരണമൊഴി?..

Jisha Elizabeth said...
This comment has been removed by the author.
Related Posts Plugin for WordPress, Blogger...

Pages